沙職爭霸「天王山之戰」爆發！冠軍在望嘅「1哥」艾納斯迎戰第2位嘅希拉爾。艾納斯目前領先踢少1場嘅希拉爾5分，今場只要贏波就提前封王，C朗拿度為實現首奪沙職冠軍美夢，肯定施展渾身解數，挾主場聯賽8連勝強勢兼無比決心，主勝值博。(on.cc東網周三凌晨2時直播)文:工廠仔

艾納斯踏入下半季氣勢凌厲，各項賽事一度踢出20連勝，雖然今個月初作客艾卡迪沙意外輸波，不過上場立即重整旗鼓，4比2大破艾沙比，各項賽事近22場贏21場，包括主場出擊10連勝。形勢上艾納斯就算打和亦有優勢，但係為免夜長夢多，必藉主場之利盡早「登基」。

星級鋒線個個巔峰
葡萄牙球星C朗登陸沙職3年半仍未嘗捧盃滋味，對冠軍極度渴求，近6場聯賽入5球保持水準，好拍檔祖奧菲歷斯近2場入4球，京士利高文同沙迪奧文尼亦踢到着火，呢條星級鋒線正值巔峰狀態，而且個個都奪冠無數，可望喺衝冠關鍵時刻發揮最佳表現。

希拉爾休息時間少
希拉爾日前喺沙特國王盃激戰下奪冠，代價係休息同準備時間比艾納斯少，球員體能肯定輸蝕。希拉爾後防主力高列巴尼受傷提早收咧，近期由中場魯賓尼維斯客串中堅，對攻守運作造成影響，近期4連勝有3場只係僅勝1球，未見霸氣，而且今場焗攻情況下，極可能被艾納斯銳利反擊打爆，一於捧主勝。
 
#百家贴士 #足球 #体育