英超「曼市打吡」爆發！有新領隊卡域克首度領軍嘅曼聯，喺主場迎戰死敵曼城，話題性十足。「紅魔鬼」今季遇強愈強，而且防守穩定性提高，客隊想喺奧脫福耀武揚威絕非易事；「藍月亮」近期重整鋒線，進攻效率有待提升，預料上半場會穩打穩紮，半場細（1.5球）值得捧場。（Now 611及621周六晚8時30分直播）文:工廠仔

曼聯落實由卡域克出任臨時領隊，更衣室不安問題暫時平息，事實上「紅魔鬼」雖然表現起伏大，但近期踢出嚟嘅成績漸趨穩定，近9場聯賽拎到3勝5和1負成績，對上4場聯賽主場亦有1勝3和不敗，攻守協調愈嚟愈好，要贏曼聯唔係想像中容易，今仗藉奧脫福主場聲勢，有力同曼城周旋。

麥比奧莫迪亞路歸隊助拳
卡域克上任無疑振奮「紅魔鬼」軍心，佢採用嘅4-2-3-1陣式，亦會令球隊發揮最擅長嘅穩守突擊戰術，尤其麥比奧莫同阿密特迪亞路兩大前鋒，已經完成非國盃歸隊，隨時候命上陣，必成曼城心腹大患，令「藍月亮」唔夠膽輕率主攻。翻查最近7次曼聯主場對曼城，有6次半場總入球開1球或以下。

曼城近期喺英足盃同英聯盃接連贏波，但撇除10比1大炒英甲弱旅埃克塞特嘅「水分」外，近期賽事「藍月亮」進攻表現都未如理想，特別喺防線傷兵滿營下，領隊哥迪奧拿嘅戰術亦轉向穩陣行先，近9場比賽有7場半場開1球或以下。即使新加盟前鋒安東尼施美安表現對辦，但佢同艾寧夏蘭特合作仍需時磨合，作客曼聯未必搶到先機，半場細（1.5球）博得過。
 
#百家贴士 #足球 #体育