今晚東網直播沙特職「首都打吡」，艾利雅德主場迎戰艾納斯，兩支同市球隊，論實力及星味，無疑有C朗助陣嘅艾納斯遠勝一籌，相信今仗會反客為主，採取強攻搶分，恐怕艾利雅德難以招架。客W熱爆燈冇肉食，考慮到艾納斯攻強守弱，各項賽事近7場作客有5次總入球開4球或以上，寧願博中位數3.5球嘅入球大。（on.cc東網周一晚上11時15分直播）文:Mic少

艾納斯曾於年初陷入低潮，一度遭遇3連敗，導致被希拉爾搶走榜首之位。不過，風水輪流轉，艾納斯已經重拾勇態，近4場聯賽全勝，加上希拉爾連接失分，艾納斯現時只落後對方3分，大有反超前之勢，球隊士氣高昂，勢必乘勝追擊，遇上護級分子艾利雅德，正係搶分好機會，應會傾巢而出進攻。

艾利雅德實力有限
事實上，艾納斯中前場人腳星光熠熠，C朗今季聯賽18次上陣入17球，另一位葡萄牙國腳祖奧菲歷斯亦有13球進帳及7次助攻，包括上仗妙傳畀C朗射入空門，協助球隊大勝艾科魯特3比0。值得一提，C朗職業生涯已入961球，只差39球，就可以取得第1,000球，肯定全力數胡，希望盡快創紀錄。

至於艾利雅德排聯賽15位，僅比處於降班區嘅達馬克FC多1分，護級形勢甚為險峻，急需要搶分。無奈球隊實力有限，始終谷唔起，近12場聯賽未贏過，只有6和6負。不過，艾利雅德攻力尚算不俗，近6場都有波入，包括攻入希拉爾大門，預料今仗就算輸波，都應該可以破蛋。此外，雙方上年9月聯賽首循環交鋒，艾納斯大勝5比1，隨時再合演入球騷。
 
#百家贴士 #足球 #体育