今晚繼續有重量級熱身賽，哥倫比亞對法國。哥倫比亞上場不敵克羅地亞，超過1年不敗身被破，信心難免受挫；再睇法國隊今次點兵，決賽周基本人腳喺晒度，上場10人應戰照贏巴西，今場再對另一南美勁旅哥倫比亞，肯定乘勝追擊，加上「高盧雄雞」近3次交手全部半場領先，半場客勝有計。（周一凌晨3時開賽）文:邪神

哥倫比亞喺世盃南美洲區第3名出線，其中對榜首阿根廷錄得1勝1和，去年3月起更保持長達1年共9場不敗紀錄，結果上場熱身賽被克羅地亞打破，該仗佢哋雖然開賽2分鐘就由祖漢艾利亞斯閃電開紀錄，但領先優勢僅維持4分鐘就被追平，更喺完半場前失守，最終輸1比2。

哥倫比亞信心受挫
法國方面，有評論指法國今次人腳「最已陣」，因為世盃後卸任嘅主帥迪甘斯，已經決定喺今次國際賽檔期「晒冷」，就算熱身賽都唔會「揸流攤」。上場對巴西所見，法國憑基利安麥巴比上半場順利先開紀錄，下半場烏柏美卡奴被逐下，仍然由艾基迪基入多粒，最終贏2比1，「麥總」嘅入波亦係佢個人第56個國家隊入波，只差1球就追平基奧特，再入波就會成為法國射手王，紀錄當前，今場肯定唔會錯過入波機會。

今場作客嘅法國無論人腳同戰意都睇高一線，再睇兩隊近3次對賽，法國全部半場領先，哥倫比亞上仗不敗身被破，信心難免受挫，捧半場客勝屬信心之選。
#百家贴士 #足球 #体育